Virliesconcours 2025
Dëse Concours, dee sech un d’Schülerinnen an d’Schüler aus dem Cycle 4 riicht an dee vum Educatiounsministère/SCRIPT organiséiert gëtt, leeft am Joer 2025 fir d'20. Kéier.
- virliesconcours@script.lu
In Zusammenarbeit mit
Ëm wat geet et?
De Virliesconcours riicht sech u Schülerinnen a Schüler aus dem Cycle 4. Et geet drëm, datt d’Kanner en Extrait aus engem Kanner- oder Jugendbuch virliesen.
D’Kanner siche sech 2 Sproochen eraus, an deene si gär virliesen:
• eng éischt Sprooch (Däitsch, Franséisch oder Lëtzebuergesch), déi d’Kand als seng stäerkste Virliessprooch ugesäit;
• eng zweet Sprooch (Däitsch, Franséisch, Lëtzebuergesch oder Englesch), an där d’Kand och gär virliest.
D’Klassefinall an d’Schoulfinall lafen an der 1. Sprooch vum Kand, d’zweet Sprooch kënnt eréischt vun der Véierelsfinall un an d’Spill.
Englesch kann net als éischt Sprooch genannt ginn, well et net iwwerall an der Grondschoul eng Schoulsprooch ass.
Wéi leeft de Concours of?
D’Kanner kënne sech en Extrait eraussichen aus hirem Liblingsbuch oder aus soss engem Buch, dat hinne grad gutt gefält. Dës Texter ginn an enger Klassen- a Schoulfinall virgelies.
Vun der Véierelsfinall un ginn et Virliestexter an 2 Sproochen:
► Véierelsfinall
◦ Bekannten Text an der 2. Sprooch (Text vum Kand erausgesicht)
◦ Onbekannten Text an der 1. Sprooch (Text vum SCRIPT imposéiert)
► Halleffinall (Texter vum SCRIPT imposéiert)
◦ Reprise vum onbekannten Text an der 1. Sprooch
◦ Onbekannten Text an der 2. Sprooch
► Finall (Texter vum SCRIPT imposéiert)
◦ Neien onbekannten Text an der 2. Sprooch
◦ Neien onbekannten Text an der 1. Sprooch (lecture à vue)
◦ Liestheater an der 1. Sprooch (lecture à vue)
Dëst Joer war d'Finall den 1. Juli 2025 am Ariston zu Esch. Gewonnen huet den Aymerick Waisse Da Silva aus der Grondschoul vu Belair-Diderich aus der Stad.
An der Broschür hei drënner fannt Dir weider Detailer zum Oflaf vum Concours.
